Тыва Республиканың Баштыңы Шолбан Кара-оол Дээди Хуралга Айыткалынга 2021 чылда бистиң регионувусту сайзырадып хөгжүдер кол угланыышкынарны дыңнаткан. Бөгүнге чедир Тывада чүгле 10 суурда соталыг харылзаа чок дээрзин Шолбан Кара-оол демдеглээн.
Тываның Баштыңы «Харылзаада бис» деп харылзаа төлевилелин тургузарын Информатизация болгаш харылзаа яамызынга дагзып каан. Төлевилелдиң кол сорулгазы Тыва Республиканың арткан он суурларынга соталыг харылзааны кылыры.

– Бо угланыышкынны Шолбан Кара-оолдуң деткип турары кончуг эки-дир! Бистиң республикавыстың ырак булуңнарынга харылзааны тургузары – 21 векте чугула херектиг. Ол дээрге республиканың ырак-узак көдээ суурларының сайзыралче улуг базымы-дыр. Информатизация болгаш харылзаа яамызының коллективинге чедиишкиннерни, салдынган эчис сорулгаларын чедип алырын күзедим – деп, Людмила Ахметова, Тыва Республиканың харылзаазының хоочуну сеткилин үлешкен.

Биче суурларга бүдүн-бүрүн баазалыг станция тургузары нарын айтырыг, ооң бергедээшкиннерин бүгү таладан өөренип шинчилеп көөрү негеттинип турар. Суурларда чурттап турар улустуң саны эвээш болганда, аңаа – бүдүн-бүрүн баазалыг станция тургузары харылзаа операторларынга экономика талазы-биле ажыктыг эвес болуп турар. Ынчангаш Тыва Республиканың Информатизация болгаш харылзаа яамызы Терлиг-Хая суурга соталыг харылзаа суургазын тургускан арга-дуржулгазынга даянып, республиканың кожууннарынга харылзаа тургузар талазы-биле ажылды күрүне биле хуу партнерство үндезилээр.